Həsənov Elxan 1964-cü ildə Lökbatan qəsəbəsində anadan olub. Vətən torpağını canından artıq sevirdi. Tez-tez bu sözləri deyirdi: « Vətən torpağını qorumaq hamımızın müqəddəs övladlıq borcudur».
Elxan 1991-ci ildə M.Ə.Rəsulzadə adına BDU-nun biologiya fakültəsini müvəffəqiyyətlə başa vurdu və Bakıdakı 139 saylı orta məktəbdə işləməyə başladı. Müəllim kollektivinin, dərs dediyi şagirdlərin dərin hörmətini qazandı. Gözəl insan, bacarıqlı müəllim idi. İki il idi ki, ailə qurmuşdu.
Elxan könüllü olaraq Ağdərə cəbhəsinə yollandı, işğal olunmuş kəndlərin alınmasında iştirak etdi. 1993-cü ilin payızında Murovdağa getdi. Bölmə kömandirinin müavini idi. Elxan döyüşdükcə qələbəyə inamı daha da artırdı. 1994-cü il yanvarın 4-də Kəlbəcər bölgəsində aldığı yaradan əbədi olaraq dünyasını dəyişdi.