Sadıqov Yusif Allahverdi oğlu 1964-cü ildə Göyçə mahalının Çilli kəndində anadan olmuşdur. Oxuduğu Çilli orta məktəbini qızıl medalla başa vurub. 1981-ci ildə sənədlərini M.Ə.Rəsulzadə adına BDU-nun riyaziyyat fakültəsinə verib birinci imtahandan «əla» qiymət alaraq qəbul olunub. 1985-ci ildə Vilhüsdə keçirilən riyaziyyat olimpiadasında birinci yer tutmuşdur. 1986-cı ildə universiteti fərqlənmə diplomu ilə bitirmişdir. 1986-87-ci illərdə İsmayıllı rayonunun Güvənd kəndində müəllim işləyib. 1987-ci ildə Elmlər Akademiyasının riyaziyyat şöbəsində işə qəbul olunur. 1988-ci ildə Akademiyanın aspiranturasında oxuyub. Yusif bacarıqlı, istedadlı riyaziyyatçı idi.
1990-cı il 20 yanvar. O günü göylər qara libas geyib, dağlar qara bağlamışdır. O günü Bakının küçələrində su yerinə qan axırdı. Şəhid qanı tökülən torpağa qərənfil gülləri qoyulurdu. Yusif o qaranlıq, müdhiş gecədə küçəyə çıxmışdı. Gözlərinə inana bilməyərək küçə boyu tökülən al qanlara baxıb göz yaşı axıdırdı. Bakıya şığıyan tanklar neçə-neçə cavanı tırtıllar altında qoymuşdu. O tırtıllar altında qalanlardan biri də Yusif oldu.