ŞABANOV OQTAY MÜSLÜM OĞLU Köçkün taleyini yaşayırdı Oqtay. 1988-ci ildə Ermənistandan Bakıya köçüb gəlmişdilər. Hövsan qəsəbəsində yaşayırdılar. Onsuz da bu vəhşilərdən çox yanıqlıydı. Qisas almaq üçün məqam gözləməyə vaxt lazım gəlmədi. Azğın düşmənlərin torpaqlarımıza günü - gündən artan təcavüzünə dözə bilmədi. Könüllü olaraq cəbhəyə - qisas almağa yollandı. Onun döyüş salnaməsinə Laçının, Ağdərənin, Kəlbəcərin adı əbədilik yazıldı. Bütün döyüşlərdə mətinlik göstərdi, əsgər dostlarının sevimlisinə çevrildi.
Şabanov Oqtay Müslüm oğlu 1966-cı il yanvar ayının 30-da Ermənistan respublikasının Amasiya bölgəsində dünyaya gəlmişdir. Sovet Ordusunda hərbi xidmətdə olub. Bir döyüşçü kimi, Oqtayın arzuları tam həyata keçmədi. O, düşməndən istədiyi qədər intiqam ala bilmədi. Onun məqsədi düşmənləri qova - qova Amasiyadan da o yana aparmaq idi. Bu inam, bu həvəslə də həmişə döyüşlərə atılır, düşmənə layiqli zərbələr endirirdi. Dostlarının dediyinə görə, hər bir qələbə əldə edəndə sevincdən Oqtayın gözləri dolardı.
- Nə qədər düşmən öldürsəm də heç vaxt doymaram, - deyərmiş. Elə bu intiqam hissilə də amansız bir qış günü - 17 yanvar 1994-cü ildə 28 yaşında Kəlbəcərin Murov dağında əbədiyyətə qovuşdu.
Məzarı Bakıxanov qəsəbəsindəki Şəhidlər Xiyabanındadır.
Subay idi. Allah rəhmət eləsin.